Piekniekrol

Die vleis wat u gebruik, moet verkieslik stukkies skenkel bevat aangesien die natuurlike gelatien die stollingsproses aanhelp. Gebruik liewers fyngekapte vleis in plaas daarvan om die vleis in blokkies te sny. Geur goed aangesien die dis koud bedien word. Verwyder ook alle senings en stukkies vleis wat nie maklik sal sny nie. Laat vleis toe om goed af te koel maar nie te stol nie. Plaas 'n reghoekige stuk waspapier op die werksoppervlak en bedek met 'n lagie kleefplastiek. Skep die vleis daarop en druk stewig daarop vas. Volg met 'n volgende lagie kleefplastiek. Rol versigtig met koekroller en probeer dit so reghoekig moontlik hou totdat dit sowat 1cm dik is (onthou dat dit sal kraak indien dit te dik is, en sal breek indien dit te dun is). Roer nou 'n halfkoppie vars gekapte soetrissie in 'n bak roomkaas met geroosterde soetrissie. Blanseer jong, vars spinasie vinnig en bedek met yskoue water. Dreineer en druk versigtig droog met 'n papierhanddoek. Verwyder nou die boonste lagie kleefplastiek van die vleis. Smeer 'n egalige lagie roomkaas-mengsel bo-op en plaas 'n enkel-lagie spinasie bo-op die roomkaas-mengsel. Gebruik die kleefplastiek en waspapier om jou te help en rol nou die vleis versigtig in 'n rol. Bedek die hele rol met kleefplastiek en plaas in 'n Franse-Broodpannetjie (om die vcrm te behou) en laat vir sowat 5 ure in die yskas om te stol. Rooster sowat 'n driekwart koppie sesamsaad in die oond tot bruin. Laat goed afkoel. Verwyder die plastiek en rol die vleisrol in die sesamsaad. Bedien met 'n lekker brood en vars slaai.

gerolde springbokrib

Glasuursel

15 ml suurlemoensap
15 ml sojasous
125 ml appelkooskonfyt
125 ml sherry

Meng en smeer rib in. Bedien met ingelegde kwe-pers, blomkool met kaassous en pampoenkoekies.

Bedien 10

1 Springbokrib, ontbeen (dit is maklik om te ontbeen, maar indien jy voel jy wil dit liewer aan iemand professioneel oorlaat, vra gerus jou slagter)

250g gemengde droë vrugte

250g spek

sout en peper na smaak

2 knoffelhuisies, gekneus

wyn om oor die vleis te sprinkel

vleisekstrak

olyfolie

tou om die rib te bind

Marineer die knoffel vir twintig minute in die olyfolie om die heur te absorbeer. Vryf die hele rib in met die knoffel-gegeurde olyfolie en geur met sout en peper (onthou dat spek in die vulsel gebruik word, moet dus nie te veel sout gebruik nie). Plaas stroke spek oor die rib. Pak nou gedroogde appels, perskes en pere oor die hele oppervlak van die rib (moenie appelkose gebruik nie omdat dit te suur is). Rol die rib op en maak netjies vas met tou. Vryf nou die buitekant van die rib in met olyfolie. Verhit olie in 'n pan en verseël die rib aan beide kante om vleissappe binne te hou. Plaas die gerolde rib op tinfoelie met die blink kant aan die onderkant. Sprinkel liggies met wyn en geur met sout en peper. Plaas twee van die ribbebene op die foelie met die vleis, en rol dit saam met die vleis op (om die geur uit te bring)Plaas die vleis in 'n kasserolbak en voeg 'n bietjie water by sodat die rib in sy eie sous gaarstoom en nie in die water nie. Voeg 'n klein bietjie water by gedurende die kookproses om te keer dat die dis nie verbrand nie. Dit hang van u af hoe lank die vleis moet bak - afhangende van die graad van gaarheid wat u verkies. Wanneer die rib gaar is, verwyder die foelie en verbruin die vleis of smeer met glasuursel. Laat die rib om te rus in die warmoond en verwyder die tou. Sny en maak 'n sous met die pansouse om saam met die vleis te bedien.

springbokboud voorberei in 'n weber

Bedien 6-8

1 Springbokboud, goed gemarineer en rypgemaak

250ml mango- of lemoensap

250ml vars suurlemoensap

250ml olyfolie

sout en varsgemaalde swart peper na smaak

1 gekneusde knoffelhuisie

10ml gemengde kruie

Meng al die bestanddele vir die marinade en los vir een dag. Sif die marinade en spuit die boud daarmee in, een dag voor die voorbereiding. Plaas die boud in die Weber vir sowat een uur of totdat 'n termometer die interne temperatuur op 60 tot 70 grade C meet.

Die boud moet verkieslik nog ligroos aan die binnekant wees. Laat die boud vir 'n paar minute rus voordat dit gesny en bedien word. Gebruik 'n groot inspuitnaald met 'n dik naald indien 'n kommersiële inspuitnaald nie beskikbaar is nie. Hierdie boud is nie ontbeen nie, en selfs al word dit tot drie dae lank gemarineer, sal die marinade net aan die buitekant geproe word - daarom is dit verkieslik om die boud met die marinade in te spuit. Bedien met sampioensous.